Aktuale
Aktualitete, Lajme dhe aktivitete nga Ikre Thun
Dora e sipërme është më e mirë se dora e poshtme
BismiLahirrahmanirrahim
Falenderimet, Lavdërimet, Adhurimet, Hamdi i qoftë vetëm Allahut xh.sh, ndërsa salavatet dhe selamet të përzemërta ia dërgojmë shëmbëlltyrës sonë Muhamed Mustafas a.s, familjes së tij, shokëve të tij dhe të gjithë atyre të cilët e ndjekin rrugën e tij deri në ditën e gjykimit. Allah na bëjë prej tyre.
Vëllezër të dashur besimtar e ju motra të nderuara, Tema të cilën fillimisht do ta përkujtoja veten time pastaj InshaAllah do t’ju përkujtoi edhe juve ka të bëjë me temën: Dora e sipërme është më e mirë se dora e poshtme.
Vëllezër të dashur dhe motra të nderuara, në mesin e vlerave më të mëdha që Islami ia ka dhënë njeriut është nderi i tij si njeri, si besimtar dhe si anëtar i shoqërisë.
Nderi i muslimanit nuk matet me pasurinë që zotëron, as me pozitën që ka, por me ndershmërinë, drejtësinë dhe pastërtinë e zemrës e të dorës së tij.
Ndër çështjet më të rëndësishme që kanë të bëjnë me nderin është edhe nderi financiar ku ne duhet të bëjmë shumë kujdes. Islami na ka mësuar se pasuria është një sprovë, jo një qëllim. Ajo është e bukur dhe e dëshirueshme, por në të njëjtën kohë mund të bëhet burim i shkatërrimit shpirtëror nëse merret me lakmi ose në mënyrë të pandershme.
Prandaj, nderi financiar i muslimanit mënyra si e fiton dhe si e përdor pasurinë është dinjitet, krenari dhe pjesë e besimit të tij.
عَنْ حَكِيمِ بْنِ حِزَامٍ رَضِيَ اللَّهُ عَنْهُ، قَالَ: سَأَلْتُ النَّبِيَّ ﷺ فَأَعْطَانِي، ثُمَّ سَأَلْتُهُ فَأَعْطَانِي، ثُمَّ سَأَلْتُهُ فَأَعْطَانِي، ثُمَّ قَالَ: “إِنَّ هَذَا الْمَالَ خَضِرَةٌ حُلْوَةٌ، فَمَنْ أَخَذَهُ بِطِيبِ نَفْسٍ بُورِكَ لَهُ فِيهِ، وَمَنْ أَخَذَهُ بِإِشْرَافِ نَفْسٍ لَمْ يُبَارَكْ لَهُ فِيهِ، وَكَانَ كَالَّذِي يَأْكُلُ وَلَا يَشْبَعُ، وَالْيَدُ الْعُلْيَا خَيْرٌ مِنَ الْيَدِ السُّفْلَى. قَالَ حَكِيمٌ: فَقُلْتُ: يَا رَسُولَ اللَّه، وَالَّذِي بَعَثَكَ بِالْحَقِّ، لَا أَرْزَأُ أَحَدًا بَعْدَكَ شَيْئًا حَتَّى أُفَارِقَ الدُّنْيَا
Hakim ibn Hizam Allahu i Madhëruar qoftë i kënaqur me të tregon: Kërkova nga Pejgamberi alejhi selam dhe më dha. Pastaj kërkova përsëri dhe më dha. Pastaj kërkova edhe një herë dhe më dha. Pastaj ai alejhi selam tha: “Me të vërtetë, kjo pasuri është e gjelbër dhe e ëmbël. Kush e merr atë me zemër të qetë (pa lakmi e etje për pasuri), do të bekohet në të. E kush e merr me etje dhe lakmi, nuk do të bekohet në të; ai do të jetë si ai që ha, por nuk ngopet kurrë. Dora e sipërme është më e mirë se dora e poshtme.” Hakimi tha: “O i Dërguar i Allahut! Pasha Atë që të ka dërguar me të vërtetën, pas teje nuk do të marr më asgjë nga askush derisa të vdes.” (Transmeton Muslimi)
Ky hadith është një thesar edukate islame. Pejgamberi alejhi selam e përshkruan pasurinë si “të gjelbër dhe të ëmbël” pra, diçka që e tërheq syrin dhe e ëmbëlson zemrën. Por kjo bukuri është vetëm një provë: kush e merr me dinjitet e qetësi, Allahu i Madhëruar ia bekon, ndërsa kush e merr me lakmi, ia heq begatinë.
Begatia nuk është në shumën e pasurisë, por në bekimin e saj. Një copë bukë hallall me zemër të pastër është më e vlefshme se mijëra që fitohen me padrejtësi.
Të kërkosh me hallall, të mos shtrish dorën pa nevojë, dhe të mos lakmosh në atë që kanë të tjerët kjo është rruga e nderit dhe e pavarësisë shpirtërore.
Hakim ibn Hizam, pas këtij mësimi nga Pejgamberi alejhi selam, u betua se nuk do të merrte më asgjë nga askush, as dhuratë, as ndihmë, derisa të vdiste dhe e realizoi diçka të tillë. Ai kuptoi se nderi i besimtarit është që të mos varet nga njerëzit, por nga Allahu i Madhëruar.
Kështu, vëllezër e motra musliman, muslimani i nderuar nuk poshtërohet për pasuri, nuk mashtron, nuk tradhton dhe nuk kërkon me lakmi. Ai punon, përpiqet, jep, dhe kur merr e merr me dinjitet e falënderim.
Lusim Allahun e Madhëruar me emrat e Tij të bukur dhe cilësitë e Tija të larta të na begatoi neve, fëmijët tonë dhe mbarë besimtaret musliman, të na begatoi me pasuri hallall, të pastërt dhe të fituar me nder dhe krenari. Amin
Hoxhë Azir Aziri
Qendra Kulturore Islame IKRE Thun