Aktuale

Falënderimi i zgjedhjeve të Allahut të Madhëruar

by:

Ikre Thun

In:

Ligjërata dhe Hutbe të shkruara

Like Up:

(0)

Like Down:

(0)

Created:

28 nën 2025

BismiLahirrahmanirrahim

Falenderimet, Lavdërimet, Adhurimet, Hamdi i qoftë vetëm Allahut xh.sh, ndërsa salavatet dhe selamet të përzemërta ia dërgojmë shëmbëlltyrës sonë Muhamed Mustafas a.s, familjes së tij, shokëve të tij dhe të gjithë atyre të cilët e ndjekin rrugën e tij deri në ditën e gjykimit. Allah na bëjë prej tyre.

Vëllezër të dashur dhe motra të nderuara, pasi sot është një datë historike për popullin tonë shqiptar, 28 Nëntori-Dita e Flamurit ose e Pavarësisë së Shqipërisë ne do të flasim për temën: Falënderimi i zgjedhjeve të Allahut të Madhëruar.

Allahu i Madhëruar i ka zgjedhur dhe caktuar për ne njerëzit disa çështje pa dëshirën dhe vullnetin tonë, si dhurata të Tij për ne. Nga këto zgjedhje dhe caktime është edhe vendi gjeografik dhe gjuha jonë.

Allahu i Madhëruar thotë:

يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ

"O ju njerëz, vërtet Ne ju krijuam juve prej një mashkulli dhe një femre, ju bëmë popuj e fise që të njiheni ndërmjet vete" (Kuran 49, 13)

Pra, Allahu i Madhëruar na caktoi se çfarë populli do të jemi dhe në cilën pjesë të tokës do të jetojmë. Zgjedhja dhe caktimi tjetër i Allahut të Madhëruar, të cilin Ai e ka bërë pa na pyetur, është edhe gjuha, për ne zgjodhi gjuhën shqipe.

Allahu i Madhëruar thotë:

وَمِنْ آيَاتِهِ خَلْقُ السَّمَاوَاتِ وَالْأَرْضِ وَاخْتِلَافُ أَلْسِنَتِكُمْ وَأَلْوَانِكُمْ ۚ إِنَّ فِي ذَٰلِكَ لَآيَاتٍ لِّلْعَالِمِينَ

“Dhe nga Treguesit e Tij është krijimi i qiejve dhe i tokës dhe dallimi i gjuhëve dhe i ngjyrave tuaja. Vërtet që në të ka tregues të qartë për njerëzit me dije të shëndoshë." (Kuran 30, 22)

Pasi atdheu, kombësia dhe gjuha janë zgjedhje, caktime dhe dhurata për ne, ne duhet të japim gjithçka nga kapacitetet tona për t’i mbrojtur dhe kultivuar këto vlera. Vetëm në këtë mënyrë do ta falënderojmë Allahun e Madhëruar për këto veçori dhe specifika që Ai ka zgjedhur për ne.

Populli ynë ka dashur fati të vuajë shumë gjatë historisë së tij për ta ruajtur indin e vet. Mirëpo ai, me vendosmëri dhe sakrificë të madhe, mbrojti fenë, vatanin, kombin dhe gjuhën e tij. Prandaj, këtë emanet të Allahut të Madhëruar edhe ne duhet ta vazhdojmë dhe ta mbrojmë me gjithçka që posedojmë.

Po ashtu, populli ynë ka dashur fati që një numër bukur i mirë prej tij të jetojë larg atdheut, pra në diasporë. Mirëpo, pa marrë parasysh këtë fakt, ne si popull shqiptar qofshin ata që jetojnë në vatan, qofshin ata që jetojnë në diasporë duhet të punojmë me sinqeritet, dashuri dhe nder për atdheun dhe gjuhën tonë, me lutje Allahun e Madhëruar që ta kthejë diasporën në vendin e origjinës së saj, të bashkuar bashkë me të gjitha trojet e saj natyrale.

E lusim Allahun e Madhëruar me emrat e Tij të bukur dhe cilësitë e Tija të larta ta bekojë vendin tonë, ta udhëzojë popullin tonë, të na bëjë prej atyre që e duan paqen, punën e ndershme dhe dijen, ta ruajë rininë tonë, familjet tona dhe unitetin tonë!

Hoxhë Azir Aziri

Qendra Kulturore Islame IKRE Thun