Aktuale
Aktualitete, Lajme dhe aktivitete nga Ikre Thun
Të folurit mirë dhe keq për të vdekurin
BismiLahirrahmanirrahim
Falenderimet, Lavdërimet, Adhurimet, Hamdi i qoftë vetëm Allahut xh.sh, ndërsa salavatet dhe selamet të përzemërta ia dërgojmë shëmbëlltyrës sonë Muhamed Mustafas a.s, familjes së tij, shokëve të tij dhe të gjithë atyre të cilët e ndjekin rrugën e tij deri në ditën e gjykimit. Allah na bëjë prej tyre.
Vëllezër të dashur besimtar e ju motra të nderuara, Tema të cilën fillimisht do ta përkujtoja veten time pastaj InshaAllah do t’ju përkujtoi edhe juve ka të bëjë me temën: Të folurit mirë dhe keq për të vdekurin.
Vëllezër të dashur dhe motra të nderuara, besimtarët musliman duhet të jetojnë mbi parimin e vëllazërisë muslimane ashtu siç i porosit Allahu i Madhëruar dhe Muhamedi alejhi selam. Ky parim që të jetë i plotë është e kërkuar që ne të ua duam vëllezërve tanë musliman atë që e duam për veten tonë, përndryshe nëse nuk edukohemi deri në këtë masë besimi jonë nuk është i plotë.
Nga çshtjet që kanë të bëjnë me vëllazërinë muslimane, padyshim është edhe çështja e ruajtjes së nderit të muslimanit, duke e kursyer atë nga mëkatet që realizohen me gjuhën tonë sikurse: përgojimi, shpifja, spiunazhi dhe të ngjashme.
Prekja e nderit të muslimanit me gjuhën tonë, është nga mëkatet e neveritshme nëse ai vëlla është gjallë, ndërsa prekja e nderit të muslimanit nëse është i vdekur është edhe më e neveritshme, nga shkaku se nga i gjalli mundesh ti kërkosh falje ose ta shpaguash dëmin, ndërsa nga i vdekuri diçka e tillë është e pamundur dhe ngelet ta shpaguash atë me veprat tuaja të mira në botën tjetër, për atë të kujdesemi që të vdekurit ti përmendim vetëm për gjërat e tyre pozitive dhe të mira se ajo ju ndihmon atyre, dhe në asnjë mënyrë mos të ua përmendim të vdekurve veprat e tyre negative dhe të këqija sepse kjo i ngarkon ato edhe më shumë.
Në lidhje me këtë Pejgamberi alejhi selam ka thënë:
سَمِعْتُ أَنَسَ بْنَ مَالِكٍ رَضِيَ اللَّهُ عَنْهُ، يَقُولُ: مَرُّوا بِجَنَازَةٍ، فَأَثْنَوْا عَلَيْهَا خَيْرًا، فَقَالَ النَّبِيُّ صَلَّى اللَّهُ عَلَيْهِ وَسَلَّمَ: وَجَبَتْ ثُمَّ مَرُّوا بِأُخْرَى فَأَثْنَوْا عَلَيْهَا شَرًّا، فَقَالَ: وَجَبَتْ فَقَالَ عُمَرُ بْنُ الخَطَّابِ رَضِيَ اللَّهُ عَنْهُ: مَا وَجَبَتْ؟ قَالَ: هَذَا أَثْنَيْتُمْ عَلَيْهِ خَيْرًا، فَوَجَبَتْ لَهُ الجَنَّةُ، وَهَذَا أَثْنَيْتُمْ عَلَيْهِ شَرًّا، فَوَجَبَتْ لَهُ النَّارُ، أَنْتُمْ شُهَدَاءُ اللَّهِ فِي الأَرْضِ
E kam dëgjuar Enes bin Malik Allahu qoftë i kënaqur me të duke thënë: “Kaloi një kortezh me një xhenaze dhe njerëzit e lavdëruan të ndjerin.” Pejgamberi a.s. tha: “U vendos për të.” Pastaj kaloi një kortezh me një tjetër xhenaze dhe njerëzit folën keq për të vdekurin. Pejgamberi a.s. tha: “U vendos për të.” Umeri r.a. e pyeti të Dërguarin e Allahut a.s.: “Çfarë u vendos?” Ai a.s. u përgjigj: “Për këtë ju folët mirë dhe e lavdëruat, kështu që për të u vendos (u pohua Xheneti), ndërsa për atë tjetrin ju folët keq, kështu që edhe për të u vendos (u pohua) Zjarri. Ju njerëz jeni dëshmitarët e Allahut në tokë.” (Transmeton Buhariu)
Pra hadithi edhe një herë na bëni të qartë se përmendja e veprave të mira të të vdekurit atë e ndihmon të hyjë në xhenet sepse dëshmia e sa më shumë besimtarëve pë të mirë ati i shtohen të mirat, ndërsa përmendja e veprave të liga atë e ngarkon sepse dëshmia e keqe për të, aty ia shton të këqijat, edhe pse çdo njërin Allahu i Madhëruar do ta vlerësojë në bazë të veprave tija, cilin do ai e falë atë me mëshirën e tij dhe cilin do ai e dënon me drejtësinë e tij.
Lusim Allahun e Madhëruar me emrat e Tij të bukur dhe cilësitë e Tija të larta ti mëshiroi të vdekurit tonë, të gjallit tonë ti forcoi në rrugën e tij, si dhe të na ndihmoi ti kursejmë vëllezërit tonë nga gjuha jonë qofshin ato të gjallë apo të vdekur. Amin
Hoxhë Azir Aziri
Qendra Kulturore Islame IKRE Thun